मुंबई: पंतप्रधान नरेंद्र मोदी यांना पहिला लता दिनानाथ मंगेशकर पुरस्कार सर्वोत्कृष्ट देशसेवा आणि जनसेवेसाठी जाहीर झाला आहे. या पुरस्काराचे हे पहिले वर्ष आहे. नरेंद्र मोदी यांच्यासोबतच गायक राहुल देशपांडे, अभिनेत्री आशा पारेख, अभिनेते जॅकी श्रॉफ आणि दिग्दर्शक चंद्रकांत कुलकर्णी यांनाही पुरस्कारांनी सन्मानित करण्यात आले आहे.
यावर्षीपासून सुरू झालेल्या लता दिनानाथ मंगेशकर पुरस्काराचे पंतप्रधान नरेंद्र मोदी पहिले मानकरी ठरले आहेत. त्यांना हा पुरस्कार सर्वोत्कृष्ट देशसेवा आणि जनसेवेसाठी प्रदान करण्यात आला आहे. त्याचबरोबर उत्कृष्ट संगीत कारकीर्दीसाठी गायक राहुल देशपांडे यांना पुरस्कार देण्यात आला आहे. तर सिनेमातील कारकिर्दीसाठी अभिनेत्री आशा पारेख आणि अभिनेते जॅकी श्रॉफ यांना विशेष पुरस्कार प्रदान करण्यात आले आहेत.
नुतन मुंबई टिफीन चॅरिटेबल ट्रस्ट म्हणजे मुंबईच्या डब्बेवाल्यांना सामाजिक कार्यासाठी आनंदमयी पुरस्कार जाहीर झाला असून संध्याछाया या नाटकासाठी दिग्दर्शक चंद्रकांत कुलकर्णी आणि निर्माते श्रीपाद पद्माकर यांनाही पुरस्कार जाहीर झाले आहेत. या कार्यक्रमाच्या अध्यक्षा उषा मंगेशकर असून त्यांच्या हस्ते पुरस्कार वितरण होणार आहे.
