तुरूंगातील केतकीचा मुक्काम वाढला
मुंबई :- मराठी चित्रपट सृष्टीतील आघाडीची अभिनेत्री केतकी चितळे हीने राष्ट्रवादी काँग्रेस पक्षाचे प्रमुख शरद पवार यांच्याविषयी आक्षेपार्ह पोस्ट केल्याप्रकरणी सध्या तुरुंगात आहे. आज मंगळवारी (ता.७ ) न्यायालयाने सुनावणी दरम्यान तिच्या न्यायालयीन कोठडीत वाढ केली आहे. त्यामुळे तिचा तुरुंगातील मुक्काम वाढला आहे.
अभिनेत्री केतकी चितळेवर आक्षेपार्ह पोस्ट प्रकरणी कळवा पोलिस ठाण्यात गुन्हा दाखल आहे. दाखल गुन्हा रद्द करावा, अशा मागणीची याचिका केतकीने मुंबई उच्च न्यायालयात दाखल केली आहे. राज्यातील अनेक पोलिस ठाण्यांमध्ये दाखल करण्यात आलेले सर्व एफआयआर बेकायदा आहेत. अटकेची कारवाईही बेकायदा आहे. व्यक्तिस्वातंत्र्याचा भंग केल्याबद्दल नुकसान भरपाई मिळावी, अशी विनंती केतकी चितळे हिने याचिकेद्वारे केली आहे.
