बॉलीवूड अभिनेत्री रिया चक्रवतीच्या प्रकरणात मुंबईतील फिल्म इंडस्ट्रीमध्ये २ ग्रॅम हेरॉइन सापडलं होतं तेव्हा भाजपसह सर्वांनी भंडावून सोडलं होत.
मात्र आता गुजरातच्या कच्छमधील मुंद्रा बंदरावर तीन हजार किलोग्रॅम वजनाचे हेरॉईन सापडले आहे. याची किंमत जवळपास २१ हजार कोटी रुपये आहे.तरी तोंडात बोळा कोंबून का बसलेत? राज्यातील भाजपचे नेते यावर का बोलत नाहीत?२ ग्रॅम हेरॉईनसाठी नंगा नाच आणि आता २१ हजार कोटींचे हेरॉइन सापडलं तर गप्प का बसलेत, असा सवाल शिवसेनेचे खासदार संजय राऊत यांनी उपस्थित केला आहे.
संजय राऊत एका खासगी वृत्तवाहिनीशी बोलताना म्हणाले की, गुजरातमध्ये सापडलेले हेरॉईन कुठे जात होते? याचा तपास व्हायला पाहिजे. या हेरॉईनचे थेट कनेक्शन अफगाणिस्तानात आहे. तालिबानसोबत संबंध आहेत तेव्हाच इतक्या मोठ्या प्रमाणात हेरॉईन सापडल्याचा दावा त्यांनी केला. याशिवाय या हेरॉईनच्या माध्यमातून कोण पैसे कमावत होते हे तपासणे देखील महत्वाचे असल्याचे राऊत यांनी सांगितले.
