अर्जुनी/मोरगाव : झाडीबोलीशी सदैव एकरूप असलेल्या तसेच मराठी भाषा सक्षमीकरणासाठी अहोरात्र झटत असलेल्या अर्जुनी/ मोर जि. गोंदिया येथील प्रसिद्ध कवयित्री सुधा अश्वस्थामा मेश्राम यांच्या पहिल्या ‘स्मृतिगंध’ कविता संग्रहाचे लोकार्पण ‘मराठीचे शिलेदार बहुउद्देशीय संस्था नागपूर तर्फे डॉ बाबासाहेब आंबेडकर सभागृह नागपूर येथे नुकतेच उत्साहात संपन्न झाले. त्यांना यावर्षीचा मराठी साहित्य लेखनाचा ‘साहित्य सेवा सन्मान’ पुरस्कार पत्रकार रेणुका किन्हेकर ‘दि फ्री मिडीया’ नागपूर यांच्या हस्ते देण्यात आला.
सुधा मेश्राम या मागील ४ वर्षापासून शैक्षणिक, कविता व साहित्य क्षेत्रात मराठी भाषेच्या संवर्धनार्थ मराठीचे शिलेदार समूहासाठी मुख्य सहप्रशासक म्हणून अविरत कार्यरत आहेत. त्यांचे भाषेसाठीचे योगदान अतुलनीय असून, शैक्षणिक दर्जा अधिकाधिक वृद्धिंगत होण्यासाठी त्या नवनवीन उपक्रम समूहासाठी तयार करीत असतात. तसेच समूहाच्या सर्व साप्ताहिक काव्यस्पर्धेत त्या परीक्षक व संकलक म्हणून मोलाचे कार्य करत आहेत. गतसाली मराठीचे शिलेदार संस्थेने त्यांचा ‘जीवन गौरव पुरस्कार’ देऊन यथोचित सन्मान केला आहे.
मराठीचे शिलेदार बहुउद्देशीय संस्था नागपूर आयोजित काव्यसंग्रह प्रकाशन समारंभात कवयित्री सुधा मेश्राम यांच्या ‘स्मृतिगंध’ कविता संग्रहासोबतच तब्बल १७ पुस्तकांचे प्रकाशन अध्यक्ष श्री.दादाकांत धनविजय,प्रमुख मार्गदर्शक श्री. डॉ.अनिल पावशेकर व प्रा.आनंद मांजरखेडे तसेच अतिथी मा.मयुर निमजे, डॉ सोहन चवरे, पत्रकार कु.रेणुका किन्हेकर या सर्व मान्यवरांच्या हस्ते करण्यात आले. याप्रसंगी राज्यातील ३० कवी कवयित्रींना “साहित्य सेवा सन्मान पुरस्कार २०२१” देऊन सन्मानित करण्यात आले. समारभांचे सूत्र संचालन राहुल पाटील यांनी केले तर आभार प्राजक्ता खांडेकर यांनी मानले.
