केंद्र सरकार या महिन्याच्या शेवटच्या आठवड्यापर्यंत देशभरातील शिक्षकांचे लसीकरण करण्यासाठी कोरोना प्रतिबंधक लसीचे दोन कोटी अतिरिक्त डोस उपलब्ध करुन देणार आहे. बुधवारी सर्व राज्यातील अधिकाऱ्यांसोबत केंद्रीय आरोग्य सचिव राजेश भूषण यांनी एक उच्च स्तरीय बैठक घेतल्यानंतर ही माहिती देण्यात आली. सर्व राज्यांतील शिक्षण विभागांशी या संबधी समन्वय साधून आवश्यक माहिती घेण्यात येणार आहे. केंद्राने देशातील शिक्षकांच्या लसीकरणासाठी उचललेले हे पाऊल अतिशय महत्वाचे मानले जात आहे.
देशातील अनेक राज्यांतील शाळा सुरु करण्याचा निर्णय त्या-त्या राज्य सरकारांनी घेतला असून अशावेळी केंद्राने सर्व राज्यांना शाळांतील शिक्षक आणि कर्मचाऱ्यांच्या लसीकरणावर भर द्यावा, अशा सूचना दिल्या आहेत. त्यासंबंधीचे पाऊल म्हणून केंद्र सरकारने शिक्षकांच्या लसीकरणासाठी या महिन्याच्या शेवटच्या आठवड्यात दोन कोटी अतिरिक्त डोस उपलब्ध करुन देण्याचा निर्णय घेतला आहे.
त्याचबरोबर केंद्राने सर्व राज्यांना देशातील ज्या लोकांनी पहिला डोस घेतला आहे त्यांना दुसरा डोस देण्यास प्राधान्य द्यावे, अशा सूचना देण्यात आल्याची माहिती आहे. केंद्र सरकारने गेल्या आठवड्यात एक आकडेवारी जारी केली होती. त्यामध्ये असे दिसून आले होते की कोरोना लसीचा पहिला डोस ज्या लोकांनी घेतला आहे, अशा 1.6 कोटी लोकांना दुसरा डोस हा वेळेत उपलब्ध झालेला नाही. यामध्ये एक कोटीहून जास्त ज्येष्ठ नागरिकांची संख्या आहे.
केंद्रीय आरोग्य सचिवांनी राज्यांना कोरोना लसीच्या दुसऱ्या डोसच्या कार्यक्रमाची अंमलबजावणी करण्यासाठी जिल्हा स्तरावर माहिती गोळा करण्याचे आदेश दिले आहेत. तसेच ज्या जिल्ह्यांमध्ये लसीकरणाचा कार्यक्रम कमी प्रमाणात झालेला आहे, त्या जिल्ह्यांची माहिती देखील मागवण्यात आली आहे.
